Pagdiriwang ng World Teachers' Day

     Ipinagdiwang ang Araw ng mga Guro o World Teachers' Day (WTC) noong Oktubre 5, 2010 sa temang "My Teacher, My Hero."
     Ginugunita ang WTC tuwing ikalima ng Oktubre upang mabigyang parangal ang mga guro. Sa araw na ito, binibigyan ng mga mag-aaral ang kanilang guro ng bulaklak o espesyal na regalo.
     Sa Pilipinas, ipinagdiwang ang pangatlong Teachers' Month Celebration (TMC) noong Setyembre 3, 2010 sabay sa Search for Outstanding Teachers. Hinikayat ng TMC ang mga mag-aaral na magsabi ng simpleng "Salamat po" sa mga gurong gumawa ng malaking pagbabago sa kanilang buhay.
     Kung walang mga guro, ano kaya ang kahihinatnan ng ating bansa? Magkakaroon ba tayo ng enhinyero, abogado, doktor, pulitiko o lider ng bansa?
     Malaki ang naiambag ng mga guro sa pag-unlad ng bansa. Binahagi nila ang lahat ng kanilang kaalaman upang malinang ang iba't ibang angking talento ng mga estudyante.
     Sa kabuuan, mahalaga ang papel na ginagampanan ng mga guro dahil sila ang humubog sa mga nagiging lider ng bansa. Isang kontribusyon na halos hindi napapansin sa pag-unlad at pagsulong ng ekonomiya. Kahit si Pangulong Aquino ay binigyang puri at pasasalamat ang kanyang mga naging guro.
     Kaya, nararapat lamang na bigyan ng isang malaking pagpupugay ang mga guro. Ang "Salamat po, Titser" ay sapat na upang maipadama sa kanila na sila ay dakila.