Monday, December 6, 2010

Lumalalang Polusyon sa Basura

     Polusyon sa basura ang isa sa mga pinakamalalang problema na hinaharap ng ating bansa. Nakakahiya kung isipin na ang bansa natin ay maraming tambak na basura kahit saan lalo pa't maraming turista ang dumadayo rito. Plastic bags ang nag-aambag ng pinakamalaking porsyento sa pagdami ng basura.
     Nakabarang basura sa mga kanal ang tinuturong dahilan ng pagbaha sa Merto Manila (MM) noong nakaraang taon. Dahil sa pananalasa ni Ondoy na tinaguriang pinakamalalang kalamidad na nangyari sa bansa, ang lebel ng tubig ay umabot na sa ikalawang palapag ng mga bahay at nakapinsala ito ng maraming ari-arian.
     Ayon sa Department of Environment and Natural Resources (DENR), nakatayang 756,986 kilo ng basura ang natagpuan sa mga tabing-dagat ng bansa. Sa bilang na ito, 622,448 na kilo ay mga plastik at goma. Halos kalahait sa mga plastik na tinatapon sa mga anyong tubig o nakatayang 300,716 kilo ay mga plastic bags ayon sa DENR. Ang mga supot ng kendi at bote ay ma timbang na 110,939 kilo.
     Sa atin pa rin nakasalalay ang kalinisan ng ating paligid. Kung patuloy tayong magtatapon ng basura kahit saan at kung hindi tayo magtitipid ng gamit, wala pa ring bisa ang pinapatupad na batas ng gobyerno ukol sa basura tulad ng "Basura Mo, Sagot Mo."
     Nararapat lamang na lalong higpitan ng pamahalaan ang pagpapatupad ng batas upang maging disiplinado ang mga mamamayan at matuto sila ng leksyon sa mga pagbahang nangyari na sa bansa. Sa huli, tayo pa rin ang kawawa kung hindi tayo magiging malinis at responsableng mamamayan pagdating sa basura. Maaaring maging pinakamaruming bansa ang Pinas balang araw kung patuloy pa rin tayong maging burara. Dapat tulungan natin ang pamahalaan sa pagsugpo ng polusyon ng basura sa pamamagitan ng pag "reuse, reduce at recycle," paghihiwalay ng basura sa nabubulok at di-nabubulok at pagtapon ng basura sa tamang lugar.

No comments:

Post a Comment