K+12; Dagdag taon, Dagdag gastos

     Gustong ipatupad ni Pangulong Aquino ang programang K+12 upang maging handa ang mga estudyante pagdating ng kolehiyo at madaling makakuha ng trabaho.
     Sinabi ni Pangulong Aquino sa kanyang unang State of the Nation Address (SONA) na sinali niya ang 12-taong edukasyon sa kanyang mga reporma sabay sabing, "Magkakapondo na po para maipatupad ang mga plano natin sa edukasyon. Mapapalawak natin ang basic education cycle mula sa napakaikling 10 taon tungo sa global standard na 12 taon.."
     Maraming negatibong pahayag ang mga magulang at estudyante sa pagpapatupad ng K+12. Nagpapahiwatig ito na ayaw nilang ipatupad ng Pangulo ang programang K+12 dahil dagdag gastos na naman ito para sa kanila. Hiling ng mga magulang na sana huwag ipatupad ang K+12, sa halip ay pagbutihin ang kalidad ng edukasyon upang magkaroon ng sapat na kaalaman ang mga mag-aaral at hindi mabubutas ang kanilang bulsa sa bigat ng gastusin.
     Layunin ng Pangulo na sa taong 2015, wala ng mga batang nasa kalsada. Dapat ay nasa silid-aralan na silang lahat upang matuto at balang araw ay magkaroon ng kontribusyon tungo sa pag-unlad ng bansa.
     Binase ng Department of Education (DepEd) ang programang ito sa naging resulta ng nasabing pag-aaral ng Trends in International Mathematics and Science Study (TIMSS) noong 2003: Ang Pilipinas ay pang-34 sa 38 bansang sumali sa HS II Matematika at pang-43 sa 46 bansa sa HS II Agham; para sa ikaapat na baitang, ang Pilipinas ay pang-23 sa 25 bansang sumali sa Matematika at Agham. Noong 2008, kahit mga pang-Agham na paaralan na para sa sekondarya ang sumali sa kategoryang Advanced Mathematics pinakamababa ang pwesto ng Pilipinas. Dapat suportahan ng mga kapwa Pilipino ang Pangulo upang unti-unting mapagbuti ang edukasyon sa bansa at sa susunod ay magiging unang pwesto na ang ating bansa sa mga pandaigdigang pagsusulit tulad ng TIMSS.
     Sa kabuuan, kooperasyon ng lahat ng sektor ng pamahalaan at pagpupursigi ng administrasyon ang kailangan upang maging matagumpay ang pagpapatupad ng K+12. Ito ay para sa ikabubuti ng bansa at pati na ng mga estudyante.